蔡伯勵算港股 明年起靜十年

時光飛逝，眨下眼仲有約一個禮拜又過年了。每逢過年過節，各路風水大師各顯神通，預測來年運程。有老友早排因緣際會，親向德高望重富豪御用的蔡伯勵【圖】老師請益，請佢老人家指點一下投資大勢。老友引述蔡伯話，今年股市會係中高尾低，年中時恒指可能創出三萬點高峰，但年尾就要萬事小心，皆因有可能會倒跌。

蔡伯提點投資者，今年要適可而止，不能太貪；農曆8月至9月好景，股市可能升到你唔信，但回落速度都不能掉以輕心。至於想買樓就要三思，因為樓市旺勢未必可以持續咁話。

凌通按蔡伯的描述，比對唔少大行對今年恒指的預測，發現大家不謀而合。最牛的券商建銀國際的蘇國堅曾經估計，今年恒指在下半年有機會升穿32000點，理由係美國不斷印銀紙。

對今年大市走勢，蔡伯所講基本上未有令人感意外之處，最得人驚的，反而係蔡伯對往後數年的預測，事關佢講明投資者今年應該見好就收，皆因過了今年之後，由明年開始個市會靜起碼20年！金魚缸中大小炒家豈不是全部唔使搵食？

之但係，有一位金融圈老友，聽過蔡伯的預測後，竟然大表認同。佢同凌通解釋，唔講風水單講大勢，美國由前年開始大印銀紙，實情係將泡沫愈吹愈大，大家都係等緊個煲幾時爆而已。至於呢20多年來風生水起的祖國，同樣都面臨資產泡沫同收入不均等大問題，經濟長盛不衰之神話隨時有機會破滅。一旦新一個泡沫真係爆破，全球經濟好似日本咁，停頓十零廿年，都唔係危言聳聽也。