陸羽仁 人生戰場 節錄 7

我寫的人生戰場系列，目的是想大家改變一下觀念，好似重新設定電腦一樣，重設人生。

首先要認清人生如戰場的現實。呢句話好似係老生常談，但在和平而富裕的社會，「戰場」二字離我們太遠，我們好像是生活在一個童話國度中，資源取之不盡，生活無乜壓力。好多人不知道，自己是一個個戰場中的犧牲品，而更殘酷的競爭還在後頭。先講職場，試想中國每年培養600萬個大學生，接近一個香港的人口，10年就是6000萬，等如一個歐洲大國的人口，長線來說，香港每年畢業的1萬多個大學生，無可避免要和大陸的大學生競爭，可見這種競爭都相當慘烈。再講投資，如上次所講，你去炒股炒匯炒金，好多時係同大戶或證券行對賭，宏觀去講，佢地鐘意同散戶對賭，因為佢地成日贏，或者輸少少俾你，長線番10倍，你去玩，贏10萬，最後輸突50萬，就等如你10年的儲蓄，即係等如10年白做! 你話慘唔慘烈? 若萬一有一個散戶炒贏錢，必定有更多老散輸錢填數。認清炒作市場弱肉強食的現實，那裏並不是流奶與密之地，那是血腥腥地流著血的地方，你行入去，就要有作戰預備，你預備好了嗎?

其次是要重設/設定人生觀念。好多人問我應如何教孩子，我話孩子也好，教自己也好，要重新設定他們/自己的觀念，明白資源緊缺，明白自己要努力爭取，明白play hard無壞，但也要 work hard(玩得盡情無壞，但也要做得盡力)。你唔想work hard，就唔好對生活諸多要求，要適應簡樸生活。你要享受，就要付出。記住，經濟學中的核心概念是緊缺，你不知物質緊缺，就唔識經濟，唔識慳使，唔知到要收入大過支出好多，你好快就玩完。在上海睇世博進入無乜人行的城市地球館，你會睇到地球的石油資源極度緊張，如照目前的使用速度，再用45年就會用光地球上的石油，這是地球上最快耗盡的一種資源，好多後生仔20幾歲，45年後60幾歲，而家人類唔做，後生仔60幾歲時或許要過電影「未來水世界」那種洪荒生活啦。重覆一句，要有「緊缺」的觀念，要知道唔做就無食，無屋住。

第三，關鍵是提升知識、能力與態度。好多家長太重視琴棋書畫，甚至過份重視母語發音的英文，而忘記了最基本的知識、思辯能力、與獨立生活對抗逆境的態度。失敗個案唔再講，有些「成功個案」，卻是名校畢業的高分低能人，出來做無固定模式要佢解決具體問題，佢一都唔識解決。過往貧窮年代孩子隨街跑，好易培養出街頭智慧(如何不受騙)、領導才能(帶小朋友玩)、獨立個性(脫離父母玩樂)與解難能力(遇到阿飛識走避)。而家的小孩好似好叻，但由於父母為他們決定了一切，不鼓勵他們獨立思考，亦令他們缺乏了最基本的獨立生存能力，甚至無乜書本以外的知識(睇父母對那些知識的興趣多唔多，若父母只愛打機睇電視，結果可想而知)，無對抗逆境迎難而上的態度，成為現代社會的「低能人」，注定成為人生戰場中的淘汱品。若論投資，最重要的是從錯誤中學習的能力，你從自己輸錢經驗中學到甚？若乜都學唔到，今次輸完，下次又會再輸。過往小孩出街玩會跌損，流完血自己搞掂，下次識諗點避，而家一切無痛，小孩跌損家長撲埋去「愛的抱抱」，代為搽藥，叫佢下次唔好再玩，小孩除了經歷父母的愛之外，乜都無經歷過，亦令小孩失去從錯誤中學習的能力。

我們應該反思自己的孩子、甚至自己，缺乏那一種生存能力，就重新設定自己與自己的孩子，提升那些能力。其中一個關鍵，是要求自己多一點，要求人地少一點，樣樣事自己做多一點，試多一點，盡多一點責任，最後著數的也是自己。有堅強的意志，知自己的不足，有改善自己的鬥心，在人生戰場，將無住而不利。

我講重設人生，係要改變自己（或自己教育兒女）過去的思維與習慣，強化自己，可以適應人生的挑戰，從而成為人生戰場中的勝利者，要改變似乎好難，其實比想像中易。

第一，改變回溯式思維，要有前瞻式思想。我話「好多家長太重視琴棋書畫，甚至過份重視母語發音的英文」，其實家長這些行為，是回溯自己過去的情況，作出一些補償式的行為。例如學琴學芭蕾舞，而家30幾歲以上的媽媽，小時候無機會學琴學芭蕾舞，因為過去學這些東西是有錢人的玩意，媽媽小時求之不可得，抱著要「把一切最好的給兒女」的心態，自己學唔到、學唔夠，就想讓女兒學這些玩藝(一般是媽媽想女兒學芭蕾舞的衝動強過爸爸)。我不反對小孩學琴棋書晝，只要他們有興趣，不過量就可以。但是補償心態太強的爸媽，就會叫孩子學很多東西，特別是孩子根本不喜歡學時，就會變成負擔，失去可貴的童年時間，對他們逼得太緊，就令他們對一切學習失去興趣。

學英文也一樣，過去香港是英國的殖民地，大老闆、高官全是英國人，英文唔好自然無運行，講倫敦音的英文好著數。但如今香港不再是殖民地，英文雖然仍然重要，但只是作為一種國際語言那種重要，並不是重要到英文要好過中文的地步。你走入一間美國大公司，內有五色人種，口音千奇百怪，只要聽得明溝通到就OK，除非你的目標是想孩子升上一間美國公司(或其他外國公司)的最高層，否則一般水平的管理人員，有口音不是大問題。若學到母語式的英文不妨礙其他學習，當然無所謂，若學母語式英文會影響孩子學中文，變得英文好中文好差，又或者學母語式英文會影響其他科目如數學、常識的學習，就認真要諗清楚。對1、2%超哂班的孩子來說，同時學母語式英文及其他東西，並無問題，但對多數較平凡的孩子，就承受不了。

以回溯式思維思考殖地時代的就業情況，英文超重要，但以前瞻式思維想未來，英文和中文同樣重要，不是單要學好英文，要同時學好中、英文。所以爸媽不能受自己經驗限制，死推子女上一條不太必須的艱難之路。

第二，提升解難能力。我們要子女適應未來的世界，不是過去的世界。拉大一點講，孩子出來做事之後，不能單靠語文搵食，10年、20年後，軟件再進步，我估同步翻譯已可能做到完美境界，即係寫一篇中文按一個掣可變成完美英文，口語也可以同步翻譯，我唔係講唔使識英文，只係講單靠英文好都賣唔到乜錢。機器較難取代的是人的思辨能力，解難能力，老細請人做事係解決問題，如何提升孩子(以至自己)的思辨能力，解難能力，至關重要，這是核心競爭力。老闆俾件你做，係想你解決佢做好番俾佢，而唔係你做極做唔掂，成日番去搵佢。後生仔問自己，爸媽有無培養你獨立解決問題的能力? 如果答案係否定的話，這也可以解釋到你做事唔成功(或仲未成功)的原因。 不過唔使驚，可以學，觀察、學習一些解難能力高的同事、上司的做事方法，去提升自己的能力吧。我的習慣是見到一個人做事做得好好，或者佢係某行業的成功人物，我會問佢成功秘訣，唔好以為人地一定唔講俾你聽，人守唔到秘密，佢覺得有一種獨得之秘，會忍唔住講，特別是近退休年齡之人，更唔怕講你聽，你聽得多就學到換位思維，識得從不同角度諗，甚至抄到少少人地成功的秘技。

第三，縮細目標做到最好。你肯去虛心學習，觀察成功人士的秘技，必有得著。以工作為例，如果自知唔係做李嘉誠的材料，就唔好要求自己太高，做好眼前工作最重要。再講投資，投資話易亦都可以好易，你要炒股發大達，幾年賺一億，唔狂炒好難做到，但狂炒之地亦是血腥之地，殺戳戰場，要問自己有幾多料入去玩，料未夠時，即使玩都只宜細注，不宜博命。按我過去的經驗，較易搵錢的地方，反而是找個別股票投資，目標是找一些開始賺錢但未有太多人知的公司，下注買佢一年半載，就有收穫。香港千幾間上公司，若果公司老細唔炒股，即使做得唔錯，初時亦易俾人忽略，你有心機研究，發掘到好公司，等佢盈利改善，一隻執三幾成唔係咁難，買呢股錯佢多數只係唔郁，唔係暴跌，因為佢都未也升過，風險就無咁大啦。投資目標唔好定得太高，保持長期獲利，係機構投資者的手法，普通人都可以學學，要改變以往日日望發達，但炒股表現卻波動極大的不可靠手法。

買一隻股執三幾成對好多人來講只是細目標，無乜味道，但如果你將呢個細目標做到最好，已經可以生活無憂，財務自由。試想你有幾十萬本金，若做到上述目標，願意買股，唔走去亂炒，10年零後有1000零萬唔係好奇，可以印印腳也。對好多人來說，若年過30幾，已經睇到事業有無機會發圍，若機會不大就難免失意消沉。我建議是返工無論如何做到最好，做到經濟唔好時老細要炒人都唔好炒你，因為返工為你帶來穩定的現金流，協助你投資。然後工餘就做揀股專家，鎖定10間、8間公司詳細研究，詳細到識講佢做乜生意，估到佢半年全年業績如何，咁你在投資上，就可以開展人生另一頁，可以成為揀股專家，慢慢你就會發覺有無窮樂趣，人生重新精彩。我自己學投資，亦從揀股開始，而且不是揀人人都知的大股，而係較少人留意的細股，但我會避開成交砌到好大的莊家股。你要代入公司盤生意中，就可以培養到敏銳投資感覺，搵到潛質股，記住揀到好股要坐得定，不要太急走，跟隻股行一個大浪，就可以有大收穫。這不是少數精英要行的路，是大多數人都行到的路。

我講營運人生、重設人生，就將自己(或自己的仔女)比作一間公司，先搞清間公司的潛質與能力，定清楚現實的運作目標，盡力把它搞好。好多人寫股評令你覺得睇完佢買中一兩隻股就會發大達，我寫的東西你睇完唔會有咁感覺，相反地你睇完會發覺即時發達好難，都係老老實實做，老老實實投資好過，我咁寫法，睇落唔好睇，但普通人睇，因為我假設呢個社會上只有少於5%係聰明人(或許他們也不用睇我的專欄)，其餘有80、90%係普通人，或者係自以為是聰明人的普通人，針對大多數的普通人，要令佢地知道發達唔易，只能慢慢來。至於另外5%、10%就真係蠢人，佢地根本唔應該炒股，唔睇股票專欄最好。

炒莊家股、炒窩輪、炒期指、炒期權，只應是5%聰明人做的，由於開局的是聰明人，玩的也是聰明人，是聰明人的博奕，聰明人的殺戳戰場。

網友企業CFO有此留言，「我想思考與自律(Discipline)對做人做事也很重要。否則碰到像Luk Sir一樣的好導師，看到好的書(我在看Peter Lynch 的投資聖經)也沒幫助。這兩年生活也開始簡約。我學不了Luk sir 少開冷氣，但這兩年也開始減少用熱水浴。還有以後也不敢買number. 我07年朋友叫我身買的那兩隻股票，跌了八成多，一隻還停了交易。但現在我打死也不賣它們，因爲把他放著便等於提醒自己有多stupid,還是個學財務的!」

「企業 CFO」是學財務的，留下CFO( 財務總監)的網名，職業雖不中亦不遠矣。網友ND問「其實你成日講要學習基本功, 我一直都好想, 只係唔知去邊度學…….有無一基本課程可以介紹一下, 甚至係唔係要去讀account呢?」睇網友「企業CFO」的留言，你地就應該知道，如果你揀錯投資對象，識會計識睇數都死，「企業CFO」聽巴買的兩隻股，一隻停埋牌，如果最後退埋市，十有九係做假數，先至可以有靚數騙得識睇數的人都買。不過大家唔好會錯意，以為我話識會計識睇數無用，我只係話識睇數去買莊家股無用，實睇數去買實實際際做生意的股票，十分有用。

再講番炒莊家股、炒窩輪、炒期指、炒期權，應該只是5%聰明人玩的遊戲，我唔知點解咁多普通人玩。你唔好理乜原因，散戶玩呢聰明人遊戲，由於對手是莊家或大戶，人家智力和財力都比散戶優勝，所以對手贏多輸少，散戶輸多贏少，或者明明散戶好似贏，但最後才發現這是對手跌錢落地的策略，結果就變輸，所以唔係超級聰明，超有定力，兼且睇透個局，好難贏錢。

陸羽仁 人生戰場 節錄 6

這幾日講到hea(漫無目的)這個話題，忍不住一講再講，hea呢種態度古已有之，於今尤烈。網友小白蛇有此意見:「如果大家都hea, 生活得過且過，社會真的不會繁榮，不會富裕，但，這純粹是一件壞事嗎……….有人在追求『中環價值』，並逼使全世界去跟隨他們。陸sir不只一次提出『中環價值』不是唯一的人生意義。但在香港，一旦有人違背中環價值，就人人得而誅之，我覺得這個現象絕不健康。我也非常反對有能力不去工作而去拿綜援，但原因是in the expense of others, 你不做，別人要把你那份也做了，而不是hea，不是不願刻苦。在看到陸sir的文章前，我已在該forum留言指責他不負責任。所謂的hea，也可以看成是一種不求追物質，質撲的生活態度。不久前新聞有報導過不丹這篇快樂指數奇高的「樂土」。不丹的人也沒有要發達，要上位，要發明乜乜等的人生目標，在香港人眼中就是hea，但這就是失敗嗎？」

我也不贊成把所謂「中環價值」強加於一切人身上，我也不贊成把hea的定義無限引伸，引伸到不博哂命住上爬就是hea。但小白蛇對hea所作的定義，恐怕非一般人所講的hea，佢話「所謂的hea，也可以看成是一種不求追物質，質樸的生活態度。」但在我眼中，hea和簡樸生活完全是兩回事。我自已在某個意義來說，都在追求簡樸生活，起碼是比一般人略為簡樸的生活，或者是環保一點的生活，例如夏天盡量不開冷氣，我都認為是簡樸生活的一種(請大家不要笑我)，但我好明白自己不hea。追求簡樸生活，是追求不太物質化的生活，如果你自食其力，住去新界，生活要求低d，亦唔要求自己搵咁多，咁有乜問題? 一d問題都無，仲對社會有貢獻，因為減低了社會資源的壓力。如果我的仔女話追求簡樸生活，我唔會反對，甚至退休後會和他們一起這樣生活，但如果他們hea，我就一定會反對，因為hea的人好多不單生活得不簡樸，還對社會造成壓力，你可以做唔去做，要做的人養埋你，這是那門子的簡樸生活?

舉一個例子說明甚麼是hea，我朋友有個仔，讀中三，聰明靚仔，成日發明星夢。朋友成日想我教佢數學，我話無問題，但要佢自己帶書來問我。有一次朋友有事，要把這個仔到我屋企半天，這個小朋友來到，想開電腦打機，但明知我會反對，因為他接近考試，應該溫習，他打機不成，也不敢開電視睇，就打橫坐在梳化，一副半死不活的樣子，我亦特意不問他，我做自己的事情，睇他如何，結果他就這樣眼光光坐了一個多小時，乜到無做，也無覺，就係咁hea度，令我大開眼界，佢父母話佢在家也是如此。我心諗，面成堆報紙，你來睇，唔睇港聞，睇娛樂版都好呀，點解可以咁樣眼光光，乜都唔做一個多小時?

這個小朋友的生活要求一d都唔簡樸，去普通一點的茶餐廳覺得人地糟，住屋間房唔大又嘈，讀七八千元學費的私校，放假要去日本，已經去了兩次(屋企希望用去日本旅行刺激他讀書，可惜失敗)，我同佢講，你讀書唔成，將來做份5000、6000元一個月人工的快餐店待應，你點去日本? 點維持而家的生活，二三十年後父母百年歸老你點算?

網友mkm介紹睇美國紐約時報一個專欄作家Thomas Friedman的文章，這篇文好好，名字叫「我地排第(十)一!」(We’re No. 1(1)!)佢話在新聞周刊一個全球最佳國家的排名中，美國頭十位也不入，係排第十一，美國人開始問自己是否失去超級大國的地位，總統奧巴馬話「美國人不甘心做第二!」但實情係第十一。

佢講到教育，話學生教極都唔好，或者問題不止是美國有好差的老師、廢柴的校長、自私的教師工會，最大問題是學生並無學習動機(同我講學生好hea如出一轍)。佢引述另一個作家的意見，指學習動機來自好奇、好勝心、父母期望、想入好大學的願望、好老師的引導、朋輩的影響等。但現實是美國學生的學習動機好弱，愈來愈多學生唔想返學，唔想用功、唔想做好。

佢認為在挑戰很大的年代，可稱為偉大時代，就產生好多偉人，如30年代大蕭條，40年代納粹，或50至80年代蘇共的挑戰，就刺激出美國人好大的動機。如今，政治領袖連叫人「犧牲」兩個字都唔敢講，所有解決方案都係無痛的，刺激經濟是在共和黨的減稅或民主黨的救市方案中挑選。

「誰敢把真相告訴國民? 中國和印度追上美國，不止是廉價勞工和匯率，她們追上來是他們都有美國那樣的自由市場，都有美國的教育，有美國人可取得的資金與科技，但最重要的是，他們有美國偉大時代人們上進的價值。他們的人民願意延遲獎賞，投資未來，比身邊的人更努力，對他們的子女有更高要求。」

這些話對香港都用，將「美國」兩個字換成「香港」就得啦。好彩這些話是由美國人講出來，如果上述那段話由我講出來，恐怕又有人話我睇唔起後生仔。如果想自己在職場、投資場上有進步，想自己仔女好d，就唔好咁hea啦，國內大城市全部都追近香港，佢地有香港的市場、教育、資金、科技，佢地有比香港更上進的價值，問香港有乜? 睇10年後自己仔女大之後香港有乜?　10年之後，人民幣自由兌換，香港面對緊的唔係是否追求中環價值的問題，面對緊係競爭力問題，面對緊係生存的挑戰。

第一，責任與改變。我在人生戰場的系列中，講到hea，講到有些人綜援覺得理所當然，惹起一些人士的迴嚮，話我將責任推到年青人、推到80後的身上。我初而錯愕，繼而反思，我自忖沒有這種用心，但為何有部份人會這樣看我呢? 我的結論是香港不知由那天開始，流行起追究責任的文化，出了大小問題，先追究責任，搵人負責，我形容為「分配責任」，分配完責任後，就送「負責人」上斷頭台，然後大家好開心睇完戲，好開心返屋企，雖然有人「被殺」，但社會無變，問題依然存在。我討論問題不是想分配責任，係想尋求改變，追究責任意思不大，改變後脫離困境最實際。千萬不要以為在打工的環境，出了事找人問責最重要，其實有活力的商業機構相當實際，出了事找出出事的原因，主要不是想找人負責，而是要尋求改變，減低住後出事的機會，甚至借此改善，做得更好。

好多犯罪學研究都發現，那些變態的連環殺手，都有不愉快的童年，好多曾受過父母的虐打，甚至性虐待。如果我們抱追究責任的心態，就應該追究戀態殺手的父母，將他們拉去坐監，因為他們要為變態殺手的行為負責，同時應該將變態殺手放出來，因為他也是受害者，無責任。但世界上無一個國家地區會拉變態殺手父母而把他放走，因為大家都想透過監禁甚至死刑，去阻止這個變態殺手再去傷害人，這就是改變，將一個變態殺手放入監倉，這個社會會變得安全一些。由此可見，尋求改變比追究責任來得實際，來得逼切，而不是只求問責，不求改變。一個hea青的產生，主要成因當然是富裕的社會環境，加上父母的過份保護做成，唔使拗，父母的責任好大，愛佢變成害佢，若是一種問責思維，發覺父母最大責任，跟住就完了，任由hea青再hea下去? 還是想方設法，令hea青改變，不再hea呢? 人過18歲之後，長大了，就可以自我改變，即使成長的環境唔太好，成長時唔太培養到你的自強心，你還是有機會改變自己。

第二，打機害死人。我自己都有打機，但不沉迷，我見過沉迷打機的後生仔，觀察他們的行為，有d怕，其中一個問題就是andrew1212所講的restart(重開一局)，例如後生仔玩賽車，轉得兩個圈，發覺被人拋離，就restart重開一局，唔會捱下去。打機令人滿足，除了在虛擬世界可以令人成功之外，就是太多restart的機會，令人不會挫敗，問題人生可否restart? 其實人生好難restart，後生仔做工有少少唔高興，以為同事對佢作出「不友善的微笑」，咁就辭工不做，半年轉一份工，和打機restart一樣，他們卻不知道，在真實人生中，每restart一局，自己的戰鬥力就跌幾個level，因為你轉得工多，僱主都知道你適應能力差，最後唔敢請你。

更恐怖的是自殺，andrew1212已講出後生仔想尋死的心態，同樣是restart的概念，佢話「覺得全世界都欠左我...對人生無理想.對工作無希望.成日覺得自己比人差...整係想快快完結此生...希望可以快的RESTART...」人死如燈滅，死亡不是restart，是gameover，恐怕要搵人教一教細路仔gameover意思，話一話俾佢地聽，他們gameover之後，人生不會再來，父母家人朋友有多難過，他們這樣做是摧毀了父母和好朋友的人生，他們「要負責任地」好好活下去。(我又好唔聽地講年青人的責任，我不是追究責任，而是要年青人承擔責任)睇村上春樹名作《挪威的森林》，就知一個人自殺對身邊好友的影響。

第三，努力與回報。無付出，無回報，千萬不要以為這個人生戰場的系列，和投資無關係，恰恰相反，有好大關係。你唔做功課去買股，聽一個罧巴就盲動，唔研究投資投機的方法，就一定輸多贏少，若果配合埋輸就賴人，輸就追究責任而不尋求改善的心態，咁你就食齊ABC餐，可以輸足一世。好多朋友有買越秀房地產(405) 或者中航科工(2357) ，我好早就提呢d股，但你聽到呢nu巴，唔一定搵到錢，你唔做功課，可能低唔敢買高去追，可能成本好低入貨但一跌就震走唔敢買番，總之有一百個輸錢的理由，佢地都曾經大升、插低、再破位大升。如果你到今天都分唔開越秀房地產(405) 和越秀地產(123) 的分別(兩個名只差一個字，睇名分唔清)，或者分唔開中航科工(2357) 和深圳中航(161) (兩隻都係中航)，我勸你唔好買股票住，做功課先啦，唔係輸死都唔知乜事，到時你唔好分配責任俾我呀，我唔係你阿爸，我話明唔負責架。人生就係咁，你唔付出，唔好望有高回報呀。個d人話你唔得因為上一代剥奪你的機會，你買股輸錢全因大戶陰你，講一d arm聽的說話俾你聽，只會磨滅你的戰鬥力，會害死你架。你在人生擂台上，俾人打低，個裁判由1數到9時，起唔起到身再來過，全靠你自己咋。你想怪教練教你教得唔好呀？想叫阿媽幫手呀？無啦，食自己啦。

我講人生如戰場，我恐怕大家未明白乜叫做戰場，所以今日想講幾個故事。

大家首先要明白，戰場極之殘酷。我聽一個大陸高人講起一個解放軍的故事。話說70年代中國和越南開戰，有個解放軍將軍個仔要上戰場，離家出發前一晚，將軍和兒子閒話，問兒子如果你地一隊作為登陸部隊要登陸搶攤，你衝上岸時第一件事做什麼? 兒子趾高氣揚地話:「我要衝在前列，奮勇殺敵，為國盡忠。」將軍長嘆一聲話:「孩子，你一岸第一件事要撲倒地上，唔好郁，唔好望，因為你地上岸人地一排機關槍掃過來，10個搶攤士兵有9個歸西，你伏在地上，垂低頭，對方子彈射來，只會射到你的背包和頭盔，射你唔死。到睇清形勢，了解敵情後，才決定是否起身進攻。」兒子聽完這話，心情大受打擊，不服氣地說:「這好像十分窩囊啊?」將軍說:「打仗是用腦的，不是用力的。我就是這樣從死人堆中爬出來，你估我當一個死了的小兵貢獻大，還是做將軍對國家貢獻大?」

你不一定同意這個將軍的邏輯，但他說的卻是實情。很多年後，看到美國片雷霆救兵，第一幕就是美國大兵搶攤，槍林彈雨，血肉模糊，極度血腥，我當時想起這個將軍的故事，心想，這真是過來人的經驗之談啊。

我們一生下來，就不自覺的上戰場，動物尤其如此。《狼圖騰》一書就講到，狼媽媽生一窩小狼，總有一隻力氣大點，它就會推開其他兄弟姐妹，搶佔狼媽媽最好最大的乳頭，為自己創造更好的生存條件，它也會長得大點，強壯著，增加自己將來存活的機會。所以小孩在爸媽面前爭寵，其實是受著這種動物天性影響，背後的邏輯是強者存活，但在如今的社會，資源過度多，其實兄弟姐妹就沒有實際需要去爭了。

但我們入學校讀書，幼稚園唔計，小學、中學一班30幾人，好快就有幾人跑出，拋離其他人，這些成績好的一群，就爭取到往後上大學的機會，這已經是一個戰場。讀完書出來打工，更是嚴厲的淘汱賽，不同工作，上至大公司行政人員新丁，下至一間快餐廳的待應，永遠都要和同級的人比較。以大公司的新人為例，一年請十幾個，不用一年，上司已經鎖定一兩個係將來的「飛升者」，覺得佢地最有潛質，其他人好有機會跌落平庸一族，在這種戰爭中，好快就有獲勝者。當然我唔係教年青人做要起打同事，大玩宮心計，如何和同事保持良好關係而自己又可以跑出，係一種藝術。但我亦大家明白，職場如戰場，你無預備入場，一返工就懶懶散散，又唔做，福利要多，你好快就跌入去平庸的一族中，你做老細，都想搵個博命、醒目，肯捱義氣的伙記，幫你睇住個檔啦。學校和公司睇落唔算好殘酷，輸好似無乜後果，但失敗的代價，可能是四、五十歲才付出，到時你先至知，我有朋友甲就因為不斷創業，不斷失敗，最後搞到離婚收場，人生黯淡。

最似戰場的是投資市場，亦最殘酷。好多人唔知，你炒外匯、炒金、炒期指，其實係同金融公司對賭，佢地唔係同你落盤出街，而係佢坐你個盤，同你對賭。我有個朋友乙最近一年炒金「好成功」，佢放低5%本金，放50萬，炒1000萬價值倫敦金，佢通常食10美元、8美元就走，買完跌落來就坐，我問佢有無止蝕，佢話無。由於金價反幅不斷向上，所以佢輸都坐得番，炒一年，以本金計賺40%，即係20幾萬，佢覺得好多，我就覺得一d都唔多，由於經紀教佢有糊要食，所以升的時候多數賺幾美元就走，如果佢坐住唔郁，過去一年金價升10幾%，如果佢直坐下來，而家隨時賺70、80萬。朋友乙贏錢，因為黃金正值大牛市，跌完都升番，佢死買一個方向就得，唔係佢高明，係個市就佢，正如索羅斯話齋，金市已有泡沫。那一天金價跌下來，朋友乙又唔止蝕，跌你20、30%，可以輸200萬、300萬，就真係入哂肉。我睇得太多呢個案，睇個現狀，未來都可以估到七七八八。

在呢d市場，散戶同間經紀行賭，你贏即係佢輸，佢而家輸緊20幾萬俾我個朋友乙，但經紀教佢止賺唔止蝕，到時方向逆轉，一定一舖殺到你突，但散戶贏錢時覺得自己好得，你想話佢，佢亦唔聽。在呢d高度競爭的森林中，首先要明白這是生存之戰，唔係講玩，如何認清對手，武裝自己，係勝敗的關鍵，好似朋友乙咁，佢唔係唔可以炒金，可以炒，但要倒過來止蝕唔止賺，止蝕會令佢唔再舖舖贏，但最後可以保命，唔止賺可以令佢買中時贏多d，但唔知扣埋止蝕的成本會點。總之，佢好似而家咁止賺唔止蝕，就將自己暴露在極大危險中而不自知。

世界永無公平，唔睇家底，單睇高矮肥瘦，聰明蠢鈍，都人人唔同，大家唔係在同一條起跑線上，但你可以調整自己的心態，培養自己的技巧，鑽研遊戲規則，才可以在不公平的遊戲中找到生路，唔去鑽研，只批評遊戲唔公平，唔係話你唔，只係話你咁做無用，鬧完一輪，自己的人生一d都唔會改善。

陸羽仁 人生戰場 節錄 5

之前講到人生戰場上最恐怖的是「漫無目的型」，非常之hea，不知想做甚麼。今天想講另一種型態，叫「理想錯位型」。報載有一個35歲的AO(政務主任)，兩年前離職，放棄了一份月入8萬元的工作，呢個前AO叫邵力競，條件一流，中學讀男拔萃，A Level狀元、大學讀牛津、成功考做政務官，可謂天之嬌子。他做官逾10年後，不滿政府官僚僵化，芝麻綠豆小事如影印文件的數量，做政務官的也沒權決定，向上司提出反對意見隨時換來死亡懲罰，所以就無癮辭職。

無可否認，邵先生是成功人士，單是讀書背景，已可以保障他在人生戰場上走上一條直路，問題是他是否喜歡這條路而矣。人各有志，只要自己想清楚，追求「中環價值」也好，追求「上環價值」、「西環價值」都好，無乜所謂，關鍵是走的道路不要和自己的目的錯配。

我覺得這位邵先生就有少少理想和道路錯配。他遇上的問題，並不是一個特區政府的獨特問題，他應該一早知，全世界好多政府都是這樣，在這種龐大的官僚架構下，人只是一粒小螺絲，AO是天之嬌子，頂多也只是大螺絲吧，要話事不做螺絲，恐怕要升到做部門處長，甚至常任秘書長的級數，才有少少話事權(之所以話「少少」，因為理論上主要決策權在政治問責的局長或以上級的官員)，在升到這些高級職位前，就只是大螺絲而矣。

我二十幾年前睇個一個研究，話香港幾百人政務官的精英小圈子中，雖然考入去好難，但最後也有大約一半人升唔到上去，升多一級到高級政務官呢個水平就行人止步，成為政務官階層的沈澱物，雖然薪高糧準，但不太如意。另一半就會逐步爬升，由首席助理乜乜司(當時的稱謂)、副乜乜司、乜乜司，當時華人升到呢d位就停止，鬼佬就可以再升到財政司、布政司。現時的情況大體上也一樣，做AO十年八載，大體上都知道自己有無機會做到「坐直升機的一半」，做唔到呢一半，要麼甘於平淡做高級政務官終老，要麼就走出來，到商界博一博。

如果話而家的初級政務官無權，過去港英年代的政務官更無權，當時的英國外交及聯邦事務部(後改名外交部)每天都發電報過來，直接就香港的重要決策落指令，所以不止小官無權，做到乜乜司的大官，都完全要聽命於英國老細，講唔上有好多決策權，有些敏感部門，更是清一色由英國人自己做番，例如保安科，裏面連秘書都是英國人，當時保安科在政府總部的辦事處，有度大閘鎖死，和其他政府辦公室隔離。回歸後玩港人治英，一般事情不再有外邊老細代香港政府車，做官的決策權加大; 雖然話話權在特首和問責局長，但只要局長不是政務官出身，不熟悉政府運作，好多時還是要對常任秘書長言聽計從，所以AO升到D6、D8級，做到一個處長，甚至官至常任秘書長，就開始有d話事權啦。

所以邵先生對AO工作不滿，覺得政府官僚僵化，只係佢揀呢份工之前，唔明呢份工的性質係唔升上高位無話事權，以為一做AO好大決策權。在這種巨大而科層化的官僚機構，唔升到好高級的話事位，就唔好期望工作好有創意，這是理想和現實的錯配。你唔鐘意咁呆板僵化，可以選擇去私人機構做，私人機構會靈活好多，問題是私人機構人工無咁高，你做得好可以跳級升，但做得唔好會被炒魷，而且經濟環境唔好時會裁員，職位安全性比政府低，危機和機會同時存在。

在人生戰場，即使一些人人都話筍的好工，亦有人做做唔鐘意做，或者捱唔到佢可以發揮的地步已經離場。也可以從一個反面講，最後勝利之人，中間捱得幾慘無人知，佢付出的代價亦不足為外人道，影印，濕濕碎啦，邊得閒俾咁多意見。

我並不想鼓吹目標單一化，或者鼓吹所謂做到生癌的「中環價值」，但係覺得做人要目標和道路要匹配至得，目標和道路不配合，人生會較崎嶇。搵工唔好太理想化，無乜工薪金又高，升職又快，做３幾年又話得事，而且工作又唔辛苦d喎。

講起辛苦，好多人抱怨工作，其實不是「理想錯位」，不是理想和道路不配合，只是抱怨工作太辛苦，好像早前有網友引述做會計的後生仔的文章，話做四大行工作時間太長，被人搵笨，佢是從打工權益角度出發，唔覺得做核數應該做到三更半夜。我又咁假設，假設四大行工作方式大改革，基本上每天都只返8個小時，但現實上四大行一年收數以百計的新仔，十零年、二十年後升得上去做合夥人者，你估係做夠8個鐘即走，還是做到唔願走之人? 我估只要你有合理的智商，博命和回報會升正比例。你付出比別人少，就唔好抱怨坐隔籬位的人爬左上去。

對就業環境不滿者，可以嘈，可以同老闆抗爭，但對自己投資戰績不滿，就無得嘈，無得上訴。投資失敗，99%和自己有關，即使有莊家設陷阱陰你，你都要問下自己，點解人地跌錢，自己會咁蠢去執，搞到俾人扒埋個銀包。在投資的世界，「理想錯配型」的投資者好多，有些人入場時好天真，亦唔係諗住狂炒，只係受市況熱度鼓動，受朋友影響，以為買股好易賺錢，以為買一隻股唔郁佢升10倍就可以變富翁，我可以話，十隻股有九隻半唔係咁，你抱咁o既心態買股，買好多唔理唔郁，最後好可能輸大鑊，買中電盈(008) 就係咁啦。投資唔做功課，唔研究，唔總結失敗經驗，可以玩到70、80歲一樣輸錢，在投資世界，理想和現實落差更大。

我觀察呢個世界係咁，在100個人中，有10個左右係聰明人，佢地比一般人叻，轉數快，另外80個智力一般，但如果維基百科的數據係，香港人IQ全世界第一，呢80個智力一般的人，其實可能都有美國總統的智力;另外10個人智力略差。

普通人以為智力決定命運，讀書叻唔叻，主要睇智力，但據我觀察成功的學生以至做到成功的人士，發覺不一定如此，專注力都好重要，可能更重要，愈是低年級愈重要。在幼稚園和小學，一個專注力好的學生(即係我地一般講上堂留心聽書無發哂夢傾哂偈的學生)，佢成績會好好多。相反聰明而不專注的學生，直至讀大學之前，表現都會比較一般，年紀愈小愈是這樣。到大學就要講IQ啦，光靠專注力不一定可以成功，所以大學裏有些不大讀書但成績都好好的學生。

但到做野的環境，講的又不同，只有專注力的工作者，做不上高級。光有小聰明的，也做不上高級。EQ高的人最大機會做上高級的職位，智力高EQ低的人做不上高職，這種人特別失落，會經常講廢人才坐上高位。當然，專注力高、智力高、EQ又高的人，不只可升上高位，更是世界級的水平。

講番那100個學生，20多年前大學學額只有1%多d，要在香港上大學，都要相當聰明比較專注的學生。如今大學學有18%，普通一點都可以入大學，或者可以咁講，智力一般，但專注力較好者，入大學都無甚難度，問題是入那所大學。若加埋副學士，有60%中學生可以升上大專，即係副學士有42%。其餘40%或許是家境不容許再讀，更多是學歷太差讀不上，這40%應該是甚不專注的一群。

如果你或你的子女屬於那1%比較專注相當聰明的一群，就不用太擔心了，輕鬆D啦香港人，唔使咁緊張啦，做父母唯一要訓練好呢班叻仔叻女的EQ，教佢地綁鞋帶就得啦，免得佢高考4條A，但唔識綁鞋帶失禮人，或者因為第一份工無房坐而投訴。

真正要做的是那80%的「普通人」，只要做，就可以在這80%的人群跑出，讀書時成為大學生。或者即使讀唔到大學，將來做做做都可以做番起。或者做都係一般，但自己搞投資，搞搞又搞到有美好生活。令一般人進步，才是我寫文的目的，這樣才幫到人。對1%叻人而言，佢地唔使我幫。對10%太蠢的人而言，我亦幫唔到(記住大部入讀唔到書，都唔係因為蠢，只因為唔專注，我自己小學和初中時都屬於呢類人)

所以Gooooood話「資質差的人, 唔通就點都要迫人在一個起晒”酒店”的大富翁遊戲上擲骰 !?」呢點我唔同意之處，就因為好多自以為資質差的人，其實唔差，只不過他們自己唔知。如果佢地以讀書唔成作為資質差的判別標準，我就唔係幾同意。以投資為例，好多讀得書好似資質好的人，投資都唔得，做都唔一定得。做要博命做才可以上位，投資要有方法，買股票要計的數，好多只是「婆仔數」，唔係微積分，問題是好多人買股只是用器官思考，唔係用大腦思考，隨著感覺走，所以輸錢，在呢個問題上，讀書上、事業上成功和不成功的人士，都會犯上類似的錯誤。

在幾唔公平的大富翁遊戲上，都有上位的機會，點解你唔可以擲骰? 點解你唔可以成功? 信自己，唔好信政治。我唔反對人建議改變大富翁遊戲的規則，但這些規則的改變，好多時都要5年、10年、20年，人生有幾多人個10年，所以想改規則唔係錯，但在規則改到之前，如何跟到規則上位，係在人生戰場的鬥爭的關鍵。你以為你自己唔得，在學校、在職場、在股市唔研究遊戲規則，唔識／唔想順住規則去玩，咁你就老襯，在這些戰場上一般意義上的「成功人士」正中下懷，這樣等如少競爭者。以職場為例，點解一個中學生唔可以做做贏一個大學生? 一個餓狼中學生，肯定強過一個小白兔大學生啦。

我想幫人生戰場上的弱者，唔係叫佢地唔鬧，佢地鬧乜都唔關我事，因為唔係鬧我，我只係想佢地明白，單是鬧改變唔到世界，改變自己容易一點。例如我話現在hea(漫無目的)的人有30%、40%，我不是想評論時事，以偏蓋全，話所有「XX後」都係hea，因為任何世代都有hea人，只是在富裕社會hea人多而矣，因為社會養得起。我只係唔希望這種hea的文化蔓延，慢慢hea得理直氣壯，慢慢變成50%人hea、60%人hea……hea的人害到社會之前，先會害苦自己。不少人讀書時唔係幾專心，讀唔到書出來做，慢慢讀番書，由於自己俾錢交學費，又知讀書有用，變得專注，網友RVR講自己做時讀夜間大學的例子，就是如此，總有機會提升自己的戰鬥力，問題係你去唔去做。

早前講起有個24歲後生仔返三份工後頂唔順同事，話唔做綜緩的事件。從網友的回應看，這種情況都唔係個別事件。網友accdia咁講:「睇左Luk Sir 篇文我也不住開a\c回應, 我細佬就正正是這一類人, 試過做10幾份工, 每一份最長不過1個月, 理由是同事逼他走, 現在說都是要先讀書, 要孝大學, 將來找一份好工等發達; 但他已 repeat了一年; 第一次A-level 5科Absent 3科, 原因是前一天晚上打機太晚起不了身; 第二次沒有Absent了, 但我看不到他study, 不是打機就是上 forum, 經常問大學生活怎樣怎樣, 我叫他做 past paper 入左U再算,他 完全唔理, 只是幻想大學出來後找到份多工, 月入3, 4 萬; 告訴他改善自己與別人相處之道否則他入大學也沒用, 他就入房唔理我。屋企人唔比$他, 他就綜援, 他說這是他「應得」, 人人也是這樣, 覺得我好衰, 我歧視他; 我跟他的社工談, 社工說這是我細佬選的路, 我應尊重他..........」

對於accdia細佬的情況，我有兩點回應，第一，懶散的人時時都有，50年前、30年前也有，但那時候懶散的人都知自己唔，而家懶散的人開始覺得懶散無問題，政府應該養他，你批評他懶散才有問題。到唔做的人多過做的人時，這個社會就玩完。第二，社工話「這是他選的路，應尊重他…..」呢個邏輯從經濟學看來有怪，如果呢個社會有99個人係非社工，有1 個人係社工，那99個人選的路是不做發夢，咁邊個出糧俾那1個社工呢? 權利和責任如何平衡?

另一個網友Gooooood就話:「唔做野拎綜援有咩問題~? 無交過稅, 又想拎著數? 其實每人一香港人都有交稅,只不過形式上不是薪俸稅. 我地被逼放棄左我地有份的土地使用權, 景觀甚至空氣質素, 而換來大家係呢幅土地上發財. 政府出售市民的權益, 換取巨大的金錢收益, 分返比市民唔係應份呀?~ 我無做野用唔到D基礎建設,政府服務, 收返D綜援都好應該呀.」

我不想作政治爭拗，因為覺得這不是一個政治論壇，只想討論經濟、投資及人生自我改善的態度。看見 Gooooood的說法，我也有些回應。第一，從稅務層面看，有人話政府的賣地收入是變相徵稅，呢種講法唔錯，因為香港的直接稅低(即利得稅和薪俸稅)，除了間接稅外，就是靠買地收入去填補，但是交這種「間接地產稅」的人，主要是買私人樓的業主，甚至加埋租私人樓的租客，所以買貴樓的人，d錢除左去左地產商那裏之外，部份亦俾重稅，但若你和私人樓無關，你就無乜交呢種「間接地產稅」。當然，每個人都有交稅，例如你食支煙都要交煙草稅，但以政府2067億元的經營收入中(2009至2010年度)，這些間接稅只是佔極少比例。

第二，從社會運作層面計，土地唔郁不能產生收益。Gooooood話他放棄了土地使用權，先不討論是否有這種權利，假設有，都不能乜都唔做產生收益，要社會上的人在土地上工作才產生收益。假設三個人坐船漂到荒島，島上乜都無，只有地，三個人從到達那一刻佔有了土地使用權，但三個人你眼望我眼，唔做野，你叫我做，我叫你做，甲話你做啦，你種野食啦，我佔有三分一土地使用權，我分d食得啦，其他兩個當然無咁笨去做，三個人都係咁講，結果大家都知，餓死哂。我的觀點只是唔好個個人講權利，唔做野。而家4人家庭可以拎近1萬元綜緩，在一宗案件中，法官舉出數字，07年6月至09年6月，共有11萬多宗綜緩申請。而07年至08年度的綜緩支出達180億元。假設如今綜援開支差不多，09至2010年經營開支2440億，社會福利支出佔392億，當中近半俾左綜緩，並不是少數目，試想如果多10萬人唔做野拎綜緩，開支就倍升，再多d，無眼睇。所以先不論對錯，如果社會上多數上只講權益，唔做野，個社會就頂唔順。

第三，從個人計，唔做野唔過癮，有d精神健康，更影響下一代。千萬不要以為拿綜援好過癮，你想像一下孩子被視為綜緩家庭孩子的感受。講到呢d問題，有人叫社會唔好標簽，我就話實際d自己博命d上進d好過，做好份工，學好投資，財務自由，無人可以標簽你，不求兼善天下，只求獨善其身，搞掂自己更易。若將個人失敗完全歸結他人，歸結社會，好似自己一d責任都無，但結果仍是失敗，何苦呢? 老土d講句，點解不在年青有得博時博一d呢?

以投資為例，我經常都講，呢個市場有好多大戶，特別係外資大戶，佢地財雄勢大，左右大局。又例如本地莊家，亦舞高弄低，謀殺散戶。但你輸了錢，媽大戶，又有何用? 一d用都無，不如檢討下自己點解輸，例如人云亦云，隨大流買貴野接貴貨。又例如見到莊家股跌錢就去執，執完俾人打荷包。檢討自己，改善自己，比媽人有用。你可能會話呢個世界「應該」如何如何，但在弱肉強食的世界，講「應該」無用，武裝自己最實際。

陸羽仁 人生戰場 節錄 4

年青人開始愈來愈多好hea（無所事事），皆因現代社會開始富裕，人們開始不用為搵兩餐而爭扎，就變成直升機父母，事事為子女做哂，做突，令子女失去求生能力，不止中產父母係咁，基層父母都係咁，以前見到仔女唔讀書會鬧，而家見佢唔讀書覺得將來政府會養佢，亦唔太緊張。這種舒服的成長環境，造就大量無所事事的族群。

網友Monica話，東南亞氣候溫暖，人都懶D，西北方氣候嚴寒，人就有奮鬥心。這是事實，唔係種族歧視，只是環境分析，現實上也有例外，星加坡處於赤道，但亦可以把人催谷成奮發上進。中國歷史有好多例子，環境可以影響整個歷史的進程，影響幾千年的文化。我地讀中學時中史科只求死背，不求甚解，但後來睇到美國歷史學者黃仁宇的《中國大歷史》，佢解釋歷史發展的成因，真有茅塞頓開之感。

黃仁宇講到中國地理上有「１５吋等雨線」，即係話每年降雨１５吋，這條線大約等如在中國地圖右上方（東三省）向左劃一條線斜斜地到西南部（雲南），在這條線之南，就是每年降雨多過１５吋的濕潤地區，即是傳統中原之地，這條線的北面，就是降雨少於１５吋的乾旱地方，即是關外之地。中原氣候較好，發展出安定的農耕社會; 關外乾涸苦寒，只能是遊牧民族聚居地。關外天氣唔好遊牧民族為求生存民風強悍，關內氣候好食好住好，人民變得柔弱。所以外族經常入侵中原，為的只是搶錢搶食物。中原人唔夠人好打，慢慢就有需要形成中央集權的國家，集中國力，倚多為勝，用人多錢多打外族人少。所以中國的氣候因素，差唔多解釋幾千年歷史一半發展原因，可見環境的影響有幾深。

後生仔hea係死局，但性格形成了，就好難改，所以做父母的，自少就要培養子女靠自己唔好靠人的性格，唔好只係俾佢學英文、學琴棋書畫、讀名校、學做超人，但係平時自己和工人照顧佢照顧到加零一，佢只是按足家長規劃做事，完全唔獨立。但由於好似用o左腦其實唔使用腦，所以不知不覺間變成漫無目的之人。

歷史發展所見，舒服的環境，只會消磨人的意志。做家長的，在細路仔細細個時要為小朋友製造一個將來要應付困難的預期，等佢地有應付困難的準備。要向他們傳播一個理念，你將來唔做o野，就無飯食，你無能力，預備o訓街乞食，唔好以為政府可以發綜援養你。做o野交稅人少，白食的人多，到時政府破產，你就要食自己。仔女無正確的人生觀，只識hea，父母留下1億俾佢，佢未夠40歲都可以花光。記住10年河東，10年河西，花無百日紅呀，香港今日咁好，20年後大陸可以好過香港。

正如網友Goal所講，「看到現在的年青人，真的有點看不下去。本人F6開始替人補習，20多歲出來工作後，幫家人供房子。結婚後，自己的房子差不多供完。從不靠人（包括伴侶）（也自信永遠不需要靠人），財務獨立，日子過得很自由自在。喜歡做自己，喜歡做自己喜歡的事，一定要財務獨立。有閒錢時幫下人，無錢時也可以幫人。要先苦後甜，抑或永遠遵從阿爸阿媽支笛（唔係話阿爸阿媽錯），由他人支配自己的人生，自己選擇。千祈唔好賴政府唔照顧你。」

正如Goal所講，財務自由靠自己，例如買樓，上一代買樓多數靠自己死慳死抵少消費打兩份工搵番來。現代年青人旅行多，一年去兩次日本，男女兩個人都唔見4、5萬，再加其他使費，唔花呢d錢4、5年夠俾間細樓首期。你可能話，而家d樓郁下300、400萬一間，唔花都唔夠錢。我總覺得樓市有週期，而家走緊去週期頂部，儲埋都唔夠錢買樓，咪唔好買住，等到樓價跌番落來，自己夠錢時才買。

我的理念是靠自己，唔好靠政府，愈依賴政府，愈會跌向社會的底層。我地教自己、教仔女，都要有呢種自強自立的精神，才可以在人生戰場中生存發展，老豆係邊個，在邊間學校畢業，反而係次要。

陸羽仁 人生戰場 節錄 3

我講在人生戰場生存之道，千萬不要誤會我話人生只有一個目標，例如一定要成功、發達，或者所謂「中環目標」。印度太子「悉達多」有太子唔做，看到人有生老病死，唔知點解要咁慘，就出家苦行，到菩提樹下坐，想參透人生的奧秘，結果成為佛教創始人釋家牟尼，佢老豆希望佢繼位為王，應該會覺得佢出家好失敗。但從人類發展的長河看，悉達多好成功，創立了一個影響千年的宗教。所以我唔係想講人人都要博發達，博到入廠，只係講應為自己的理想而奮鬥，至於理想係乜，就唔係我可以為大家定啦。

不過從超現實回到人間，大多數人都是想安居樂業，有世俗定義上較成功的人生，至少老來財務自由，不用向政府伸手。但有些類別的人種，就距離目標太遠，這就是好hea(即漫無目的，無所事事)的人，我稱為「漫無目的型」。

在網友的引述後，看到一個叫「ive133133」的後生仔在一個討論區的留言。佢話：「今年24歲，覺得工作好可怕，以後都唔會再搵工。做過三份工，一份清潔，一份侍應，一份廚房，結論係三份工都有幾個共通點，人工低工時長，最可怕係D同事，根本佢地全部都係假仁假義，有咩事就賴哂我度，再唔係就排斥人，搞小圈子，而家見到人對我「微笑」我真係會驚，工作真係好可怕.....所以我而家日日無所事事，屋企叫我搵工我聴左就算數，介紹工比我做都推左佢。」

「後生仔」留言後，惹來支持和反對的回應。有人話：「咁我祝樓主你屋企人真係要長命萬歲，唔係點養同照顧你呢個不思長進嘅人，小小事就話乜話物，仲要同人大大聲講話今年係24歲，我真係替你屋企人難過，生舊叉燒都話可以食落肚，生你就真係........」後生仔馬上反駁：「我有講過我有問屋企攞錢咩? 我而家d積蓄如果唔大洗都可以用四五年，用哂到時咪最多攞綜援。」

又有人話：「樓主度度(做事)都係咁架啦。」後生仔話：「所以咪唔搵工囉。」另一個評論話：「攞綜援囉........」後生仔就話：「一定會，我只係攞番我應得既野。」又有人評佢：「乞兒無種，懶情變成。」後生仔又答謂：「呢d嘢係觀點與角度啫，我有我無憂無慮生活，你有你做一世奴隸嘅生活。」

而家好多後生仔其實漫無目的，好hea，自讀書時開始，都唔知自己想做乜，最後就過一個由頭hea到尾的人生。我覺得人各有志，唔一定要有「中環目標」，但至少都應該有少少目標，唔要求你對世界有貢獻，都至少唔好由出世至死亡都係世界一個負累。

呢個後生仔做過三份工，「一份清潔，一份侍應，一份廚房」，都是較基層的工作，我並不是職業歧視，行行出狀元，做這些工絕對有人出人頭地，成為酒樓老闆，清潔集團主席，或者不求發達，競競業業做好呢份工都得。除非呢個後生仔是17、18歲才是新移民來港，否則多數是讀書不成，讀不上去，才要做基層的工作，基層工作辛苦、工時長、環境差，又是人所共知的ABC，不想做這些工作，為何讀書時不努力? 努力讀書入大學，做啲工咪舒服啲囉? 後生仔有無同班同學入咗大學，同樣24歲打份好工呢? 佢有無問吓自己點解做唔到那些好工?

後生仔講的返工問題，真係濕碎到唔濕碎，同事「假仁假義」，「有咩事就賴哂我度」，「排斥人搞小圈子」，對住佢「微笑」都係問題，咁多問題，佢有無諗過係自己的問題。我做嘢的經驗，真係少咗啲對我假仁假義的微笑，俾老闆問候就試得多，如果同事對我假仁假義微笑都要走，我都走咗一千次啦，我估忍微笑容易過忍粗口啩。後生仔咁不滿，說穿了就是怕辛苦，唔想做。既然唔做都得，有食有住，可以頂得幾年，又點解要做呢?

老實講，你做唔做都無所謂啦，你住屋企食屋企問阿爸阿媽攞錢其他人管唔到，即使攞綜援都算啦，最恐怖係後生仔話一定會攞綜援，仲話「我只係攞番我應得嘅嘢。」點解佢會覺得攞綜援係佢「應得」? 請問你24歲做過幾份低收入工作，有無交過稅? 恐怕交都無交過，有交過亦交唔多，而佢由出世可能在公家醫院開始，在津貼學校讀書、若住公屋或居屋，諸如此類，用了無數公家資源，稅又無乜點交過，點解佢會覺得攞綜援係「應得」? 未來啲後生仔，個個唔做嘢話攞綜緩係應得嘅，咁政府邊度有錢發綜援，政府點維持下去? 呢個後生仔唔係錯在唔做嘢，而係錯在唔做嘢以為自己好啱，好應份。

當社會充斥著這些人時，伸手的人多，交稅的人少，這個社會沒有希望，愈來愈窮。個個人都想唔做嘢就可以過無憂無累的生活，問題是人人如此時，生活資源從何而來？天跌落來？如果要有人做嘢才有這些生活資源，點解你唔做嘢無憂無慮過生活又何以平白享受？唔好將呢啲嘢變成生活態度問題咁簡單，其實係責任問題，總有人要負責，要人人分擔責任，有人白食，其他人就要做多啲。

看明珠台的大城小廚，英國名廚Jamie Oliver想在英國小鎮推廣人們自己煮食，不吃薯條等現成垃圾食物，他教人煮食時，發現有不少人無做嘢攞福利金，典當渡日，教佢地乜嘢都無用，做嘢只得一份鐘熱度，就好似爛泥扶唔上壁，一扶上去三分鐘就跌落來，真係極度恐佈。發達國家福利太好，就是這種下場。

陸羽仁 人生戰場 節錄 2

1. 

我講「人生戰場」，係講人生如戰場，若想成功，就要不斷戰鬥，而且首先要戰勝自己。網友Goal有一個評價，說中了我心裏的話。佢咁講:「陸Sir，你真係好風趣同謙虛。拜讀你的blog，我各樣學識增進不少。也全靠各位blog友的分享。我五年前睇完德川家康，係巧合，果陣時仲未開始投資買股票，仲做緊定期。也對生意管理一竅不通。但是，從那時起，我特別鍾意看成功人士失敗的書（好似好茅盾），他們點樣成功，失敗，再起，再跌。特別想知道他們最後失敗的原因，也不是作爲自己的警惕，因爲自知自己無本事做一個成功的人。純粹想學下野。借書比我的人，比我叻好多，對此書認識比我深好多，但係股票投資上，仍遭遇滑鐵盧。」

我話Goal說中了我的心裏話，並非是他說「陸Sir，你真係好風趣同謙虛」那一句，我其實主觀上懶風趣，客觀上唔謙虛。我是說人生的成功與失敗，其實是一脈相通，無論古代的帝王將相，今天的販夫走卒，做人、做事，返工、炒股，看似是風馬牛不相及的東西，其實是一脈相承，成功有成功的脈絡，失敗有失敗的軌跡。具有成功性格的人，你好難將佢打敗。充滿失敗性格的人，佢又好難達至最終的成功。而我認為，德川家康那種堅毅不拔的性格，是最關鍵的一種成功性格。

Goal話，「我特別鍾意看成功人士失敗的書（好似好矛盾），他們點樣成功，失敗，再起，再跌。特別想知道他們最後失敗的原因，也不是作爲自己的警惕。」要成大事業之人，首先要明白成大事業之難，這個講法看似很低能，好　ABC，其實好多人唔明白。我自己就有這種經歷，我剛出來做事兩三年，升到一個主任位，那時睇公司的老總，覺得佢個位好易做，行行企企，食飯幾味。但二十年之後，我自己在另一間公司升到老總(CEO)的位置，才知道呢個位好難做，簡單一句叫「上蒸下焗」，除了公司業務要做到超常地出色才可保住份工之外，對上要應付老闆，對下要面對同事，一Ｄ都唔易做，到這一刻我才知道，二十年前的我的想法太天真了。

好多人就是把事情想得太易，所以跟本無準備用超凡的堅毅意志去做事，返工如是，投資也如是。返工以為上司是靠擦鞋上位，一句「我唔擦鞋架」，就放棄了所有力爭上遊的努力。我見過唔少高級管理人員，就唔見幾多個只是靠擦鞋上到位，或者有些人表面都幾擦鞋，這只是在掩藏他的真正實力所在，又或者減低大老闆對他的敵意，這些高管無義務告訴全公司的人，他上位的真正力量所在，否則天天有人來挑戰他，他咪好唔得閒。

炒股也是一樣，愈是新仔，愈覺得炒股賺錢容易，在市好的時候，睇報紙跟個number，全副身家一買，過幾個月升一倍，他當然覺得我是股神，大地在我腳下。殊不知只是跌入莊家股的陷阱，最後莊家散貨，散戶一鑊熟，這種曾經富有的感覺，相信好多「老股民」都有過。贏過又輸過，死過又番生，才知道炒股好難，要有十年以上持續贏錢或輸少贏多的紀錄，一d都唔易。

明白做事之難，才能忍，能忍他人之所不能忍。李登輝公然表示崇拜德川家康，試想佢20歲在日本留學後坐郵輪回台灣，恐怕那時都有台灣獨立的思想，好快就看到二戰結朿，日本殖民政府撤退，國民黨殘兵敗將登陸，他那裏會看得起這些靠把槍就指指點點的「大陸人」。但還是在國民黨政府這個大陸人主導的世界，以一個台灣本土人的身份，捱出頭來，最後竟然成為蔣經國指定的國民黨主席接班人，做埋台灣的總統，這時他的台獨根才冒出來，運用權術，分化統派的連戰和宋楚瑜，暗挺只有不到4成民望支持的陳水扁上台。李登輝可以忍40、50年，才去實現自己的理想，無論你是否認同他的所作所為，但以他一人之力，在台灣這種環境局限下，竟然可以運作到這種地步，我只能寫個服字。

你想工作成功，你可以有多堅忍? 你想投資出眾，你付出過多少努力? 簡單點講，不願付出，是不會在人生戰場上成功，最後只能是一個口水佬，讚下這一個，彈下那一個，因為你根本無落場參賽。

陸羽仁 人生戰場 節錄 1

1.
我地要「提醒自己唔好get carried away」，即係話唔好俾自己的成功帶去自滿的境地，最後自陷失敗的難面。我地做人的成敗，好大程度和成長有關，艱難的成長，造就堅強的性格，將來應付挑戰的能力高一些，迎難而上，成功的機會大一些。舒服的成長，特別在直升機照顧下的成長，只能產生柔弱的性格，將來應府挑戰的能力低一些，遇難即縮，成功的機會細一些。

2.
德川家康年少時是送到敵人家中寄養的人質，講錯一句話，做錯一件事，可以命都無，其磨難之慘烈，可想而知。不要講八十後，就算七十後、甚至六十後，年少時磨練都不多。年少時磨練越少，出現哈利波特個作者羅琳所講的「人生是一個failure by default(設定失敗)」的機會就愈大。在受磨練的人心中，人生只是一場遊戲，好似打機咁，開局打得唔好，可以馬上restart重來(我見好多後生仔打機都係咁打)。佢地唔知道人生其實是一場戰鬥，無得restart! 若果你在舒適的環境長大，睇睇書，看看報，了解一下某些成功人士成長的環境如何艱艱，至少都可以擴閣自己的視野，多思考自己本來從來無思考的問題。

3.
Monica講起那個年青人「碎料」，雖然用語「寸」了一點，但月入不足3萬，買300萬多的樓，以求「升呢」，借九成月供萬幾，用一半收入供樓，覺得好輕鬆，的確未充份體會到在泡沫市中買樓的風險。我年紀大一點，看過一個又一個的波浪，見過唔少人買樓炒樓好風光，亦見過唔少人炒到要破產，所以對泡沫有點戒心。特別在香港這種經濟發展已達高原的地區，不要少看未來經濟的挑戰，以及個人就業的困難。

同樣勇進買樓，在大陸和香港處境有好大不同，大陸經濟還在高速增長，兩地樓市同樣有泡沫，但樓市長線和經濟增長同步，高速增長可以消化泡沫。正如Monica所講，我兩年前已不斷叫人趁內地樓市低迷買樓，舉北京CBD的二手住宅為例，當日28000元一平方，今天45000元，升了60%!阿爺打擊樓市，都無乜點回落，只是買賣兩閒。假使外圍經濟環境轉壞，樓價跌兩成，跌回36000元一平方(暫時看機會不大)，估計阿爺已頂唔頂要反手干預阻止樓市下滑，唔會俾佢暴跌七、八成。所以買貴少少守三幾年，即使跌都有機會再上高位。但香港唔同，港島樓已追上97價，但以太古城樓價為例，都要等13年後，今天才可以重上97年的高位，而新界樓價好多還只是高位一半，例如深井樓價幾時可以去返1萬元一呎的97高位?(而家未到5000元)，可能永遠都唔到。所以即使做同一件事，冒險在高位買樓，結果也可能不一樣，要看當地經濟發展的前景，唔好睇少香港經濟未來面對的挑戰。

在艱困中長大的人，睇危險會睇得多一些，為自己留的後路又會多一些，所以在人生戰場中生存的機會也大一些。

陸 Sir II

年青人開始愈來愈多好hea（無所事事），皆因現代社會開始富裕，人們開始不用為搵兩餐而爭扎，就變成直升機父母，事事為子女做哂，做突，令子女失去求生能力，不止中產父母係咁，基層父母都係咁，以前見到仔女唔讀書會鬧，而家見佢唔讀書覺得將來政府會養佢，亦唔太緊張。這種舒服的成長環境，造就大量無所事事的族群。

  網友Monica話，東南亞氣候溫暖，人都懶啲，西北方氣候嚴寒，人就有奮鬥心。這是事實，唔係種族歧視，只是環境分析，現實上也有例外，星加坡處於赤道，但亦可以把人催谷成奮發上進。中國歷史有好多例子，環境可以影響整個歷史的進程，影響幾千年的文化。我地讀中學時中史科只求死背，不求甚解，但後來睇到美國歷史學者黃仁宇的《中國大歷史》，佢解釋歷史發展的成因，真有茅塞頓開之感。

  黃仁宇講到中國地理上有「１５吋等雨線」，即係話每年降雨１５吋，這條線大約等如在中國地圖右上方（東三省）向左劃一條線斜斜地到西南部（雲南），在這條線之南，就是每年降雨多過１５吋的濕潤地區，即是傳統中原之地，這條線的北面，就是降雨少於１５吋的乾旱地方，即是關外之地。中原氣候較好，發展出安定的農耕社會; 關外乾涸苦寒，只能是遊牧民族聚居地。關外天氣唔好遊牧民族為求生存民風強悍，關內氣候好食好住好，人民變得柔弱。所以外族經常入侵中原，為的只是搶錢搶食物。中原人唔夠人好打，慢慢就有需要形成中央集權的國家，集中國力，倚多為勝，用人多錢多打外族人少。所以中國的氣候因素，差唔多解釋咗幾千年歷史一半發展原因，可見環境的影響有幾深。

後生仔hea係死局，但性格形成咗，就好難改，所以做父母的，自少就要培養子女靠自己唔好靠人的性格，唔好只係俾佢學英文、學琴棋書畫、讀名校、學做超人，但係平時自己和工人照顧佢照顧到加零一，佢只是按足家長規劃做事，完全唔獨立。但由於好似用咗腦其實唔使用腦，所以不知不覺間變成漫無目的之人。

 歷史發展所見，舒服的環境，只會消磨人的意志。做家長的，在細路仔細細個時要為小朋友製造一個將來要應付困難的預期，等佢地有應付困難的準備。要向他們傳播一個理念，你將來唔做嘢，就無飯食，你無能力，預備瞓街乞食，唔好以為政府可以發綜援養你。做嘢交稅人少，白食的人多，到時政府破產，你就要食自己。仔女無正確的人生觀，只識hea，父母留下1億俾佢，佢未夠40歲都可以花光。記住10年河東，10年河西，花無百日紅呀，香港今日咁好，20年後大陸可以好過香港。

 「看到現在的年青人，真的有點看不下去。本人F6開始替人補習，20多嵗出來工作後，幫家人供房子。結婚後，自己的房子差不多供完。從不靠人（包括伴侶）（也自信永遠不需要靠人），財務獨立，日子過得很自由自在。喜歡做自己，喜歡做自己喜歡的事，一定要財務獨立。有閒錢時幫吓人，無錢時也可以幫人。要先苦後甜，抑或永遠遵從阿爸阿媽支笛（唔係話阿爸阿媽錯），由他人支配自己的人生，自己選擇。千祈唔好賴政府唔照顧你。」

        正如Goal所講，財務自由靠自己，例如買樓，上一代買樓多數靠自己死慳死抵少消費打兩份工搵番來。現代年青人旅行多，一年去兩次日本，男女兩個人都唔見4、5萬，再加其他使費，唔花呢啲錢4、5年夠俾間細樓首期。你可能話，而家啲樓郁吓300、400萬一間，唔花都唔夠錢。我總覺得樓市有週期，而家走緊去週期頂部，儲埋都唔夠錢買樓，咪唔好買住，等到樓價跌番落來，自己夠錢時才買。

       我的理念是靠自己，唔好靠政府，愈依賴政府，愈會跌向社會的底層。我地教自己、教仔女，都要有呢種自強自立的精神，才可以在人生戰場中生存發展，老豆係邊個，在邊間學校畢業，反而係次要。

陸羽仁

國內投資

國內投資：from Luk Sir blog 

1．如果你純是從投資角度出發，全國的大部份省會城市都可考慮 （ 西藏、青海等例外 ），就是較窮的省份，省會的城市建設和經濟活動亦不會差到那裏，樓價有上升動力，就是新疆的烏魯木齊和內蒙的呼和浩特這些偏遠城市，這十幾年投資房地產的，亦令不少人發了財。全國除了那四大城市外，最贵的也不過10000—30000一平方 （ 即 1000—3000元/呎 ），今天在當地來講是天價，但以今天國內發展的速度，真是高處未算高（ 就像香港的 七、八十年代一樣 ），持貨十年，翻1至 2倍是極有可能的事。

2．買樓是人生大事（ 不管自住或投資 ），因為別人的喜好不一定是你杯茶，因為買樓除了考慮它的升值能力，還要考慮它的出租回報，你對這個城市的喜愛，有些地方你不喜歡，有物業在那裏你都會覺得不舒服，除非你有很多物業，否則你今天投資的物業， 出租多年後，可能有一天你自己都會住進去。所以你最好實地考察，多去幾次。

3．我們在國內買樓等如隔山買牛，而且地產商莨莠不齊，就是大的發展商也不一定會好的，最好不要貪便宜買樓花，最好買剛落成，有實樓可以看的新樓，因為你看了會安心，就算買贵了一些，長線來說，回報還是會跑赢那些劣質樓。因為國內的保養問題， 舊樓的質量都有一定的問題。

4．選擇城市的問題，四大城市和其他省會城市各有優点，上海和北京，雖然贵些，但有租金回報抵消一些費用，因多外資，租出較易，而且你租給這些公司，自己都放心些。如選擇省會城市，入場費會低些，回報百分比未必差得過上海和北京，但你的租金收入可能會有問題，因為外資不多，當地的有錢人大多有自己的房子，中等收入的人，根本租不起你的房子。

5．如果考慮上海和北京，上海又比北京好些，因較接近港人生活習慣和口味，而且是全國最安全的城市，那些天價房子根本不要碰，風險高也。可考慮地鐵沿線靠近地鐵站的地方，上海地鐵眾多，最好選1，2號線，有些路線 （如 9號 ），終點站可能重遠過屯門。地鐵沿線有些地方的價錢比那些中心点如徐家匯和陸家咀便宜一半，風險較細，有些網友推介的莘庄是不錯，因為它在1號線上，而且是1號線的終點站，較易上車 （上海的地鐵真是廹到你唔信 ），而且莘庄是一個新區，區內設施齊備，但十多年前，這裏只是一個農村而已。但買上海的樓就要注意室內的佈局間隔，上海的房子外表漂亮，但室內的佈局大多很不合理 （那些極豪的樓如新天地當然例外，最近一、兩年的新樓亦有些改進 ），連其他小城市亦不如，港人多看不順眼，例如它的厕所設計很多都是沒有窗的，我兩年前在古北看過一個和黃新盤，都是這樣的，而且質素不見得怎樣，所以不要相信名牌，要實地考察。古北以前亦是一個不錯地方，有小台灣之稱，因為很多台灣和韓國人眾居，但近年不覺得怎樣，因為畢竟沒有地鐵站，而且室內的設計都不是太好呢。

6．至於其他省會城市，如果要買就要買最好的地段，因為它們的天價，對我們來講仍不算很贵，至於選那個城市，就要看你的個人口味了，個人覺得成都，重慶，青島，大連都不錯，成都兩年前曾被選為全國最快樂的都市，這個城市不太大，亦不太小，天氣怡人，生活悠閒，市民肯消費，但又有一定的經濟動力，很多港商都喜歡在這裏投資，有位飲食名家古鎮鍠亦有在這裏投資餐館。重慶是一個山城，有点像香港，樓市熾熱 （ 看它的樓房高度就知道 ），經濟強勁，缺點就是四大火爐之一，但我在 40 度時去過，並沒有想像中熱，而且現時很多北方城市夏天亦達 40度的高溫。大連和青島雖然不是省會，但勝在乾淨，風景市容好，大連是東三省最適宜居住的城市，所以東三省的有錢人都喜歡在那裏置業，房價有上升動力，青島的風景好更不用說了，當然，上海附近的江浙大城市如杭州，蘇州，無錫，南京，常州因為距離上海近 （ 半小時至兩小時的車程 ）, 但房價卻與上海有一段距離，都是可以考慮的。

7．中介問題---公司大小不是問題，港資公司亦沒有特別優勢，主要是看跟你那位 sales或經理有沒有本事，一些小公司的老闆又有本事，跟得又貼，做法靈活，並不比大公司差也。
========================================================================

大家好!我也分享我在深圳買樓的經驗, 剛在今年7月在深圳羅湖區買左間一房的細單位, 大約80萬人仔,過程都真係幾煩, 有d經驗都可以分享一下:

- 港澳台同包及外國人現時只能買一套房
- 經紀佣金係樓價3%, 全由買方支付, 不過你可以同經紀講下價打下折
- 稅金同手續費比較多
- 可以用外資銀行港幣供樓,如恆x, 匯x, x享, x隆, 南x, 東x等, 可以借到8成貸款
中國四個一線城市, 北京, 上海, 深圳, 廣州, 廣州唔係好知, 北京及上海比深圳高接近一倍,但租金收入就差唔多, 好似我宜家層樓淨回報都有約4.2%, 管理由租客比, 當然買樓呢d人生大事, 都真係要問多d, 聽多d, 睇多d啦!

=========================================================================

無論你在何處置業，建議無論如何都要親自到現場看看實樓。發展商質素良莠不齊，就算同一發展商旗下的不同樓盤，亦可能質量有別。更神奇的是就算同一個樓盤，不同座數，亦大有可能由於外判施工隊的不同而出現外貌一樣，內竉大細超的現象！ 我買的一個烏蠅型小區盤，總共ABC三棟樓，但就分別判俾三個承建商去做。當時是買樓花（其實都起好十幾層了，因內地規定發展商需投入工程總投資1/4之後才能取得預售證，以減少爛尾風險），小弟十分好彩，買的A棟單位聘用之施工隊做事認真，小毛病有，但結構及重要枝節上質量很好。但買B/C兩棟的朋友就煩惱一大堆，聽說因為投標後期該項目管理層轉變，B/C兩棟的工程就判給了另一公司，加上趕工，質量就變得好差。爆水管、滲漏、墻身不整、大門爆裂之事時有聽聞。 所以買一手樓樓花你真系要講運，假如買到質量差的你以後都好頭痕，因為假如你不在當地住的話，你邊有時間成日去執頭執尾？除非你有親戚在，不過有亦麻煩，最好祈禱乜事都無。 揀出名發展商會晤會好D？最多都系爛尾風險少，至於質量，來來去去都系那幾個施工隊，其實一樣。以廣州為例，富X地產名氣夠曬大，但亦出名質量麻麻地。新XX地產話系香港發展商啦，但去現場睇下樣板房都已經甩頭甩骨，連個sales都話唔好意思。我買的那間就中小型，不過聽聞有政府和軍方背景，內地潮語就是“不差錢”，但好彩買到好似我那個A棟單位的，亦好過買地產巨頭那些豆腐渣。 至於手續，買一手樓時候都會有本小冊子俾你，列明時間表，什麽時候首期款要到，什麽時候交契稅，什麽時候可辦理房產證，一目了然。 二手樓就可以去找中原之類的港資地產，大陸有間滿堂紅都OK，agent會幫你一條龍搞掂，同樣你都最緊要系第一時間問他拿個辦手續的流程表。 錢方面就蛇有蛇路鼠有鼠路，不過我識幾個傳統長者都仍然系帶一大堆CASH過關，認真把炮，俾海關查到就麻煩。 其實頗不建議你跑去太遠地方買樓（做投資），真系有質量或者合同或法律糾紛問題的時候，山高皇帝遠，飛來飛去都不是辦法，還是那句，除非你經常去那裡出trip，或者長住。 珠三角大把選擇，我始終認為系深圳廣州好D。東莞硬系覺得佢亂七八糟，惠州就當系退休好了，佛山其實唔錯，廣佛地鐵就快通，樓價卻平廣州好多，你不妨考慮下。

陸sir好文

我講「人生戰場」，係講人生如戰場，若想成功，就要不斷戰鬥，而且首先要戰勝自己。網友Goal有一個評價，說中了我心裏的話。佢咁講:「陸Sir，你真係好風趣同謙虛。拜讀你的blog，我各樣學識增進不少。也全靠各位blog友的分享。我五年前睇完德川家康，係巧合，果陣時仲未開始投資買股票，仲做緊定期。也對生意管理一竅不通。但是，從那時起，我特別鍾意看成功人士失敗的書（好似好茅盾），他們點樣成功，失敗，再起，再跌。特別想知道他們最後失敗的原因，也不是作爲自己的警惕，因爲自知自己無本事做一個成功的人。純粹想學下野。借書比我的人，比我叻好多，對此書認識比我深好多，但係股票投資上，仍遭遇滑盧。」

    　我話Goal說中了我的心裏話，並非是他說「陸Sir，你真係好風趣同謙虛」那一句，我其實主觀上懶風趣，客觀上唔謙虛。我是說人生的成功與失敗，其實是一脈相通，無論古代的帝王將相，今天的販夫走卒，做人、做事，返工、炒股，看似是風馬牛不相及的東西，其實是一脈相承，成功有成功的脈絡，失敗有失敗的軌跡。具有成功性格的人，你好難將佢打敗。充滿失敗性格的人，佢又好難達至最終的成功。而我認為，德川家康那種堅毅不拔的性格，是最關鍵的一種成功性格。

    　Goal話，「我特別鍾意看成功人士失敗的書（好似好矛盾），他們點樣成功，失敗，再起，再跌。特別想知道他們最後失敗的原因，也不是作爲自己的警惕。」要成大事業之人，首先要明白成大事業之難，這個講法看似很低能，好　ABC，其實好多人唔明白。我自己就有這種經歷，我剛出來做事兩三年，升到一個主任位，那時睇公司的老總，覺得佢個位好易做，行行企企，食飯幾味。但二十年之後，我自己在另一間公司升到老總(CEO)的位置，才知道呢個位好難做，簡單一句叫「上蒸下焗」，除了公司業務要做到超常地出色才可保住份工之外，對上要應付老闆，對下要面對同事，一都唔易做，到這一刻我才知道，二十年前的我的想法太天真了。

    　好多人就是把事情想得太易，所以跟本無準備用超凡的堅毅意志去做事，返工如是，投資也如是。返工以為上司是靠擦鞋上位，一句「我唔擦鞋架」，就放棄了所有力爭上遊的努力。我見過唔少高級管理人員，就唔見幾多個只是靠擦鞋上到位，或者有些人表面都幾擦鞋，這只是在掩藏他的真正實力所在，又或者減低大老闆對他的敵意，這些高管無義務告訴全公司的人，他上位的真正力量所在，否則天天有人來挑戰他，他咪好唔得閒。

    　炒股也是一樣，愈是新仔，愈覺得炒股賺錢容易，在市好的時候，睇報紙跟個巴，全副身家一買，過幾個月升一倍，他當然覺得我是股神，大地在我腳下。殊不知只是跌入莊家股的陷阱，最後莊家散貨，散戶一鑊熟，這種曾經富有的感覺，相信好多「老股民」都有過。贏過又輸過，死過又番生，才知道炒股好難，要有十年以上持續贏錢或輸少贏多的紀錄，一都唔易。

    　明白做事之難，才能忍，能忍他人之所不能忍。李登輝公然表示崇拜德川家康，試想佢20歲在日本留學後坐郵輪回台灣，恐怕那時都有台灣獨立的思想，好快就看到二戰結朿，日本殖民政府撤退，國民黨殘兵敗將登陸，他那裏會看得起這些靠把槍就指指點點的「大陸人」。但還是在國民黨政府這個大陸人主導的世界，以一個台灣本土人的身份，捱出頭來，最後竟然成為蔣經國指定的國民黨主席接班人，做埋台灣的總統，這時他的台獨根才冒出來，運用權術，分化統派的連戰和宋楚瑜，暗挺只有不到4成民望支持的陳水扁上台。李登輝可以忍40、50年，才去實現自己的理想，無論你是否認同他的所作所為，但以他一人之力，在台灣這種環境局限下，竟然可以運作到這種地步，我只能寫個服字。

    　你想工作成功，你可以有多堅忍? 你想投資出眾，你付出過多少努力? 簡單點講，不願付出，是不會在人生戰場上成功，最後只能是一個口水佬，讚下這一個，彈下那一個，因為你根本無落場參賽。

陸羽仁